Ինչ է ոչ շաքարային դիաբետը

Ոչ շաքարային դիաբետ

Հիվանդությունը պայմանավորված է ենթատեսաթումբ-հիպոֆիզային համակարգի ախտահարման հետևանքով վազոպրեսին հորմոնի թերարտադրությամբ։

Էթիոլոգիան։ Կարող է զարգանալ սուր և քրոնիկական վարակային հիվանդությունների, հուզումների, գանգի վնասվածքների և հիպոֆիզի ուռուցքների հետևանքով։

Վազոպրեսինը կամ անտիդիուրետիկ հորմոնը օրգանիզմի հեղուկների օսմոլյարությունն ու օսմոտիկ ճնշումը կարգավորող հիմնական նյութն է։

Վազոպրեսինը երիկամի խողովակների հեռադիր հատվածում` խթանելով ջրի հետկլանումը, ապահովում է օրգանիզմի ջրաաղային փոխանակությունը։ Հակամիզամուղ հորմոնի անբավարարության պայմաններում թուլանում է ջրի հետկլանումը, բարձրանում է պլազմայի օսմոտիկ ճնշումը, առաջանում անհագ ծարավ (պոլիդիպսիա) և շատամիզություն (պոլիուրիա)։ Երկու սեռի երեխաները ամեն տարիքում և միևնույն հաճախությամբ կարող են հիվանդանալ ոչ շաքարային դիաբետով։

Կլինիկան։ Հիվանդությունը երբեմն սկսվում է միանգամից և, ծնողները որոշակի կարող են ասել հիվանդության սկսման օրը։ Կարող է զարգանալ նաև աստիճանաբար։ Հիվանդության հիմնական նշաններն են ծարավը, հաճախամիզությունը և գիշերային անմիզապահությունը։ Երեխաները հաճախ արթնանում են գիշերը և ջուր խմում։

Բուժումը: Հիպոթալամիկ ոչ շաքարային դիաբետի հիմնական բուժումը փոխարինող թերապիան է, որի համար նշանակվում է ադիուրեկրին՝ խոզի հետին հիպոֆիզի պատրաստուկ կամ վազոպրեսինի սինթետիկ պրեպարատ՝ լիզին-վազոպրեսին կամ վազոպրեսինի անալոգ՝ ադիուրետին (դեսմոպրեսին):